呢日第八場係禮拜六罕有編排之分級賽，結果大摩出到「威爾頓」攞彩，馬王即係馬王，這匹應屆香港盃冠軍，縱負131磅，讓亞軍「包裝鬥士」18磅，兼全程走四、五疊勁蝕位，仍能晒神級後勁，將一排對手掃晒，大熱門馬夥拍雷神捧走1800米三級賽百週年紀念銀瓶，連續兩場後上贏短馬頭，盡顯一流鬥心，大摩則打破告仔近期對分級賽之壟斷，兼且收復上屆同一賽事輸晒四駒之失。
這場二至四名順序係「包裝鬥士」、「多名利」同「喜蓮巨星」，全是實力馬，四重彩仍派10,604元算好分。
東莞首富鄭強輝愛駒「威爾頓」自從上仗技術性擊倒「軍事出擊」勝出香港盃後，已確立現役長途一哥地位，由國際一級賽轉戰本地三級賽，加上「軍事出擊」退出，竟有2.2倍實在超賠率，要多得一眾蝕分輕磅馬閘前幾乎全線落飛，其中配杜滿萊之「包裝鬥士」，拉士衝到好行以為贏得，臨門卻被愈追愈有之「威爾頓」擒下，「包裝鬥士」受讓18磅仍要輸做二奶，只能說技不如人。第三名「多名利」上屆香港瓶建功後，至今仍守齋。