雖然日日着波鞋，但男人係有鋪西裝癮，想唔認都唔得。
記得上次睇完《Skyfall》，患上了收身西裝後遺症，着了幾天窄身老西扮James Bond；今次早着先機，入場睇《皇家特工：間諜密令》（Kingsman: The Secret Service），睇完誇張到有衝動去裁縫店造一套孖襟直紋重料西裝，再來一件黑色絲絨匙羹領Smoking Jacket加暗綠格仔Black Watch Tartan長褲，配漆皮皮鞋！
如果說一身肌肉的Daniel Craig擁有穿西裝的完美身材，架起眼鏡的Colin Firth就散發穿西裝的完美氣質。五十幾歲人着一套收腰孖襟西裝，沒有阿叔影子，一點也不易。身材固然重要，更重要是一舉手一投足都要像個紳士：落酒吧飲健力士，眼神高傲不失溫柔，連講粗口都只能用貴族標準口音。
暴力美學 備受非議
一向「靠把口搵食」的影帝Colin Firth，收起《A Single Man》的曖昧眼神和同志的眼淚，也不做口吃國王。今次手口並用，着住防彈西裝，鈕都唔除，一個打廿個，轉頭呷一口陳年威士忌，打一個英式笑話完場，由頭帶到尾，比喬治六世更有王者霸氣，好睇到暈。
有靚衫有演技有特技有拯救地球有公主獻身，崇洋版的男人之浪漫，莫過於此。新年假期想入場睇番場戲，係時候諗吓睇「叮噹」定睇呢套先。
話說《皇家特工》以舊式特務片包裝，笑位多又卡通化，不過暴力場面未必位位觀眾受得起。其中一幕「德州教堂大屠殺」，應該是近幾年塔倫天奴系列以外，最瘋狂的暴力場面之一，歷時幾分鐘的百人互相殘殺，基本上想得出的死狀都共冶一爐， 看到最後死屍滿佈的神壇，連殺人無數的特工都精神崩潰。試映時我偷望柳太，從表情得知她不太欣賞這種暴力美學，而旁邊的媽媽更加掩住細路雙眼，難怪這一幕在美國都備受非議。
口裏批評 實則想睇
Colin Firth辯護說：“I don't think it's glamorous, I think it's silly.”是卡通化的暴力，比起現實的暴力遜色得多。的確，看到社交網絡傳閱恐怖分子殺人放火的短片，觀眾口裏咬牙切齒，實際上誠實地獵奇剝花生，人類骨子裏兇殘暴力，對鬥爭暴力樂此不疲。電影裏，邪惡的Samuel L. Jones㩒個掣就能令一間教堂內的人喪失良知，互相仇殺，看似很恐怖。放眼我們的社會，只需散播一個似是而非的概念，重複仇恨的言論，自有人跟着走、對着幹。無論你穿着多麼漂亮的西裝，你根本就是這麼簡單的動物 。
最後，九唔搭八地引後藤健二的一句：「憎恨並非人的工作。」
Profile：柳俊江
前新聞記者、主播，動物NGO工作者。現為自由傳媒人兼「另類生態學家」，透視傳媒生態、動物生態、
社會生態。《反智動物》討論最高智商靈長類動物之種種反智行為。