於2008年總統大選俾奧巴馬掃走嘅羅姆尼，輸完之後，大概冇乜反省自己點解大敗，反而心思思想話東山復出，舊年臨到年尾就放聲氣話會再來一次，暗中叫佢啲擁躉留番啲錢，唔好咁快捐俾其他共和黨候選人住，等一等先，自己可能會再參加共和黨總統候選人初選喎！
怎不知，敗軍之將，不足言勇，羅姆尼放風之後反應認真麻麻，佢自己啲競選舊部亦唔睇好，投向其他可能候選人嘅陣營，搵定工先，結果羅姆尼諗過度過，知難而退，話明不再參選，於是乎共和黨其他候選人嗱嗱聲去接觸羅姆尼啲捐款人，鬥搶錢。
羅姆尼唔選，共和黨羣雄奮起，起碼有六七個咁多，但一般以為小布殊總統嘅細佬，前佛羅里達州州長Jeb Bush有錢，有父兄舊臣支持兼有知名度，做州長時有政績，能講西班牙話，對爭取拉丁裔選民有利，成為共和黨2016年總統候選人，幾有希望。
又係布殊？民主黨方面，以希拉利克林頓最有聲氣，於是可能又係布殊對克林頓，如1992年。美國之大，唔係冇人呀，點解來來去去都係布殊對克林頓？「經濟學人」前一期封面講America's new Aristocracy，講美國雖無貴族，但新一代另類貴族已經形成。百幾年前子承父業，承繼豐厚莊園遺產，係美國「貴族」，但現在就係承繼精英教育先至可能成為新貴族；父母同是大學畢業生嘅話，子女最有機會入讀精英大學，一畢業就憑父母關係，憑一級大學文憑，搵到最好嘅高薪工作──然後一代傳一代，形成新皇朝（dynasty），如果有埋財產繼承，當然更好，布殊羅姆尼就係呢類，有錢有教育（哈佛耶魯），克林頓夫婦係第二類，兩人憑自己努力，考入耶魯法學院，成為總統之後，個女進入史丹福，嫁得好，下一代大概又會走入史丹福耶魯，一路平步青雲。「經濟學人」話美國數字顯示，受過大學教育嘅父母對兒女自小就會讀書講故事，送子女入一級幼兒院，幼稚園，學習音樂，讀寄宿學校……即係等於我地香港父母不能讓子女輸在起跑線！「經濟學人」嘅封面插圖幾趣怪，父母子女四人穿18世紀古裝，母親帶名牌手袋，聽iPhone，父親揸住iPad穿耶魯外套，兒子戴棒球手套及史丹福大學帽，女兒手持小提琴及一本書叫做Mandarin for Beginners！唔怪得蓋茨話後悔唔識中文，羨慕朱克伯格講普通話好流利咯！香港「貴族」最緊要教好仔女中文呀，如果唔學，就落後於美國新貴族！