呢日二至四場由華將建功，第五場四班千六米輪番洋將攞威，傷癒復出之潘頓騎大熱門沈廐「超有利」留前鬥後，末段曾受困多時冇位出，但內欄稍有空位捐上，輕騎即刻彈甩對手，未有耐到終點，已經見潘頓摸馬頭，最後100米處已收韁，贏個半馬位，姿態輕鬆到不得了，進步到得人驚。
這場二、三名「金剛仔」同「會心微笑」都係冷門，啡燈馬「喜威威」反而跑得麻麻哋，於韋達胯下姍姍來遲跑梗頸四，四重彩扭歪咗，咁就派五萬六千幾。
講番「超有利」，近七場掃咗三冠兩亞，成為沈廐今季首匹三捷馬。此廐剛周三晚跑瓜咗隻620萬拍賣馬「華麗登場」，呢日贏番隻19蚊公眾熱門，算係補償，咁啱「超有利」都係拍賣馬。