娛樂圈通常有個現象，就是一些影星，會從幕前跳到幕後，例如：周星馳、劉德華、吳鎮宇、杜汶澤……等等，就連好友Shine的徐天佑也當導演了。小妹當然沒有他們的級數，但剛好跟他們相反，我是無啦啦由幕後轉戰幕前的！
排隊面試撰稿員
小妹這個半桶水的編劇學徒，剛巧遇上中、港合作的大製作熱潮，這個可憐的小學徒便無辜辜成為犧牲品了。結果我常躺在家裏沒事幹，一個月先得三、四次「劇本局」，雖然自己非常enjoy那段齋玩的日子，還不停跟好友說笑：「我退休啦！」「吓？你廿幾歲就退休？」「係呀，捱咗幾年，夠啦！」朋友間當然知道我是說笑的，但是，當爸爸聽到了之後，便大罵我一頓：「我養到你咁大都未退休，你夠膽喺我面前話退休？」「我話小休啫！」結果小妹偶然間看到有線電視招聘《活得很滋味》旅遊節目撰稿員的廣告，心諗：「我咪活得很滋味囉！嘩！ 仲有得免費環遊世界喎！旅遊稿應該唔難寫啫！」一於去試試！
記得自己親身排隊去參加第一回面試當日，小妹足足排隊排了一個早上加半個下午：「嘩！咁多人失業？定係個個都諗住有得環遊世界呢？」終於輪到我了，謹謹慎慎的答了幾個問題之後，原來還要自創旅遊報告，最後，過五關斬六將，終於受聘為10個reporters妹妹之一。此時，有線的工作人員叫我去試鏡，小妹即時非常抗拒地推搪了：「我嚟寫稿㗎咋，我唔上得鏡㗎！」「做乜呀？你被人通緝緊呀？」「差唔多啦！其實我做開電影幕後嘅，無啦啦出咗鏡我驚俾啲行家笑呀！」「好啦好啦，君子不强人所難，你就做番寫稿啦！」太好啦，一心以為可以環遊世界啦，哼！點不知……原來我識日文……害了我……去來去去都係日本！其他妹妹又西班牙、又德國、又法國……我就東京、大阪、名古屋……被騙了！被騙了！不過其實這段日子過得很充實，因為每次出埠拍攝之前，小妹也要做好資料搜集，好讓我對熱愛的日本有更深厚的認識！
之後，我又跳槽去了無綫收費電視，轉換了新環境不足兩星期，上司走來對我說：「下個禮拜二，東京LV fashion show，四日三夜，media tour。」「哦！」（一向習慣了她「即時即要」的作風）「咁邊個做主持呀？」「唉……我哋新請個主持未攞到working visa，所以……今次拍硬檔幫我頂咗佢啦！」「吓！我唔得㗎！我唔出得鏡㗎！我驚鏡頭㗎！」「嘻，東京你又熟、時裝你又熟、個show做一晚咋嘛，你講兩句嘢就得㗎啦！主力影啲衫㗎嘛！你得㗎啦！」
被上司逼上螢幕
這個逼良為娼……呀，唔係，係逼上梁山……呀，都唔係……應該係逼上螢幕的故事，就這樣發生了！小妹拍攝前非常緊張，還專誠找朋友來教化妝！結果拍攝完成後回到公司，上司非常滿意我的表現：「唓！又話驚鏡頭？！好好呀，好自然呀！」「我拍完先知原來我同個鏡頭咁friend嘅！嘻嘻！」「一於添食啦！東京你咁熟，旅遊稿你又識寫，就拍日本嘅旅遊節目啦！」「不如我以外判形式幫你拍吖？我同導演去拍完，之後返嚟逐輯賣番畀你，有冇得諗？」「吖，大個女啦喎！」「唔係呀，其實最主要係我唔想返office工咋！」
從此，小妹便由幕後跳到幕前，亦成了一間山寨製作公司的CEO！（固定員工只得我一人！）
【風人院】
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行糸列1-7》
本欄逢周日刊登
