近日如果經過時代廣場，你會見到一個新展覽，展覽館門外寫住「一代醒獅」（圖）四個大字，愛好體育者不妨入去睇睇，包你有驚喜，皆因入面放咗一系列獅子，又紅又綠又黑，有現代有古物，形態美學並重，好彩的話你會見到物主，一講到舞獅定必雞啄唔斷，留名學嘢乃常識吧。
早過一班本土派之舞「龍獅旗」者，乃姜氏昆仲，兄弟有三，皆能武能舞，姜氏龍獅團至今乃「獅二代」，創立者姜老先生數十年前於香港仔田灣起壇，冇錯就似王家衞套《一代宗師》天台開武館咁款。唔同嘅係梁朝偉講「舞龍舞獅唔正經乜乜乜」，而現實版姜氏真係正派，苦心經營國術，教拳教舞獅仲教徒弟做人，多年來門生無數。未夠，仲要幫舞獅洗底，皆因此國術以前畀人感覺係同幫會有關，但現實係黑白灰銀行商場個個都會幫襯，打鑼打鼓開張慶典乜都擺個意頭乃我國傳統，採個青封老毛大吉大利相信任何生意佬都很想要吧。
唔講唔知，獅子真係有分級別，除咗《墳場動新聞》有桃園三子外，獅界都有劉關張之分，仲有呂布獅。獅子頭顏色形態各異，唔同場合當然耍唔同步法，呢啲傳統嘢姜氏兄弟非常認真承傳，仲將國術推廣到「啡唇界」，近年三葉牌都同姜氏龍獅多次合作，嚟緊仲會有電影，關心本土體育者絕對不能錯過。梁
梁栢堅
填詞人+彩池人