中大校長沈祖堯噚日去教育及職業博覽講「鮮為人知的校長二三事」，現場三百聽眾，有學生、老師等，沈祖堯教學生讀書秘訣，要「畫公仔畫出腸」，即一路讀一路畫，最好教人做功課，因為聽完書未必識，識得教人，就一定識，此之謂施比受更有福。
佢話做實習醫生時唔願放工，先有機會試做盲腸、膝蓋、筋骨手術。一九八三年港大醫學院畢業後去威院，上司卻唔賞識佢，指沈祖堯仕途太順，要畀啲挫折佢，於是將沈祖堯做嘅研究，沈祖堯個名放最後，即係話功勞大減。佢一九八八年獲裘槎獎學金，去加拿大讀碩士，在機上心灰意冷，打算永別香港。
永別只係一時衝動，學成歸來嘅沈祖堯，研究用抗生素治療幽門螺旋菌對胃潰瘍，原來勁過食胃藥，當年佢交呢份研究去英國第二大期刊發表，但被拒，後來有英國第一大期刊總編輯賞識，發表後一炮而紅大，成為呢方面權威。