馬會推出的「優異成績特別獎金計劃」，用意鼓勵馬匹拼搏，只要任何一駒於年屆五歲前，首度在第二班賽勝出，馬主便可獲75萬特別獎金。睇番近三次日賽尾場，都係編二班賽，結果分別由「直震撼」、「聰敏不凡」及「精彩鬥士」贏馬兼領取特別獎金支票，其中後兩駒更與同樣爭特別獎金之「日威夜威」和「詠彩繽紛」包辦連贏。今戰(7號)尾場二班1400米，「平步青雲」、「豈等閒」、「麯院風荷」、「進綵」、「太皇鷹」及「比卡超」，若然勝出可獲75萬特別獎金，話唔定又可包Q。
機會最高當然係「比卡超」及「平步青雲」，前駒今季表現大熟大勇，六戰獲兩勝兩位兼未失獎金，因輕磅而換上紀仁安，戰鬥力未有減弱，有力征服二班。
至於「平步青雲」復課由郭能試大閘勝出，熱身一場後狀態有進冇退，既然上仗初出已瘋狂落飛搏殺，捲土重來當然有重視必要。