中國人有句說話叫做唔怕生壞命，最怕改錯名。八方唔敢話民建聯陳克勤改錯名，只能嘆句真係好多人搞錯佢個名囉！繼前排佢個黨民建聯整街板時，雞乸咁大隻字將立法會議員陳克勤寫成「陳克群」後，估唔到連廈門政協都將佢個名搞錯，同樣幫佢改咗個新名叫做「陳克群」。
陳克勤早兩日去咗廈門開政協會議，點知去到議場，見到自己個名牌寫住「陳克群」（圖），好彩佢個政協證冇搞錯啫。其實累積至今，陳克勤已經有好多個代號，例如「李克勤」、「李克強」、「陳克強」，連埋最新嘅「陳克群」同埋真名，有五個咁多。
有網民懷疑今次搞錯係拼音累事，但係陳克勤好醒，知道勤（qin）同群（qun）根本唔同音，可能係「i」同「u」兩個字母喺鍵盤上係鄰居，啲人手快快打錯啫。