東莞首富鄭強輝嘅愛駒「威爾頓」，上季連勝香港經典盃、打吡大賽同女皇盃三場一級賽，強勢登上馬王寶座，今季佢頭三戰走樣未勝，但熱身足夠後，上場香港盃回復應有水準，以短頭位力壓「軍事出擊」捧盃。
「威爾頓」雖然勁，但今季佢嘅風頭，完全畀廐侶黑衣巨人「步步友」蓋過，個個都將「步步友」捧到天上有地下無，話佢係今季馬王大熱之選，咁「威爾頓」豈不是蟬聯寶座無望？
當然啦，家陣先係季中，仍言之尚早，「威爾頓」今期（7號）賽事將會復出，為免被「步步友」進一步比下去，今場梗係不容有失啦；事實上，「威爾頓」呢次跑百週年紀念銀瓶可以話形勢大好，雖然孭133頂磅，但主要對手「軍事出擊」突然因食慾不振宣佈退出，餘下對手之中，居得只得「包裝鬥士」同「桃花心」今季識贏，而呢對馬嘅實力同「威爾頓」大有距離，加上「步步友」又冇報呢場，「威爾頓」真係想輸都難！