老列納（圖）走人，邊個正式接手，昆士柏要成功護級都唔易；不過投注逐場計，該隊最差嘅時候或已過，今晚主場受讓新敗嘅修咸頓半/一，變數出現，可直取較有分頭嘅[+1]。
排尾二嘅昆軍今季作客一分未取，不過單計主場戰績兩個世界，聯賽排第十位；除咗季初揭幕戰輸過畀同級嘅侯城外，另外兩敗分別喺利記同曼聯腳下，不敗率達75%。另一有利因素，當然係睇到管理層有變，值得畀多次機會。
辛度雲尼亞里復出救亡
哈利列納以雙膝痛到行唔郁為理由劈炮。佢老人家呢幾年累計執教昆軍嘅超聯勝率，不足19%嘅劣績，早應該落鑊。季初買急劇退化嘅里奧費迪南番嚟，打正選中堅；又公開嘲笑中場泰拉拔超重，畀對方顯示弗爆身型反擊，睇到呢位原英超最老領隊，有啲技窮。最後球會決定唔肯再科水增兵救亡，佢扮「董伯」借啲意跳船；大家留意，哈利叔臨別做好事，提示今場迎前列修咸頓，中場重將辛度雲尼亞里復出，球隊今場有得揮。睇吓咁多變數，昆士柏班高薪兵，識唔識喺主場爭氣。
修咸頓，呢屆英超嘅捧場客甜心；不過上次主場竟負殘陣嘅史雲斯，睇到隊波中後場幾位主力繼續養傷，上半場攻得急，下半場冇晒。中鋒加斯安奴柏利被嘜死，兩翼側擊又受制於密集防禦，修咸頓變招能力已唔多。筆者好少貼呢隊波，因為場場被捧熱，喺各強隊逐漸上力下，季尾爭到前四踢歐聯難度幾大。
下周中英超加開快車，球隊會步步為營；其中早前提過，仕途同老列納一樣險峻嘅領隊布魯士，今晚將率領聯賽三連敗嘅「老虎」侯城，作客火力逐漸回升嘅曼城，睇怕凶多吉少。何況「老虎」下周中要迎戰阿士東維拉，演護級大戰；就算前鋒有番入到波嘅謝拉域，目標應該放喺下場，可博追分心切嘅曼城大勝波膽。今晚尾場同市打吡戰，愛華頓迎利物浦，就唔會理下周中比賽，齊齊拚盡，兩隊守力一般，「大」最值博。
最後，續追「黑貓」新特蘭搶分成功。史雲斯上仗守死咗修頓，譽滿場邊，但唔代表今晚返主場夠火力，攻得入有番啲氣勢嘅新特蘭。英超興輪流威，過份被吹捧或睇死，從來最忌。
波神
神級攻略 智破足彩