鄒凱光（灘叔）雖然在電影創作曾一度陷入低潮而轉做DJ，不過卻令從前直腸直肚的他學到謙卑，種下近年在電影事業上回春的種子。去年他執導、吳君如監製的賀歲電影《金雞SSS》大收四千多萬，今年再接再厲炮製《12金鴨》，先旨聲明不提政治民生，反而希望香港人看完電影後可重拾人與人之間的感情。唔想社會疏離唔一定要唔戴口罩，睇戲都Duck！
撰文：文國駿
鄒凱光日前於九龍灣接受本報專訪，宣傳他執導的賀歲電影《12金鴨》。問到他「金雞系列」為何突然講鴨（男妓）？灘叔表示去年為了《金雞SSS》跟吳君如四出走埠宣傳，觀眾反應極佳，君如亦不止一次跟觀眾表示希望可以拍金鴨，他笑言：「意大利人都話正，至少有國際市場啦！」灘叔又說自己「一生都做緊」資料搜集：「鴨唔一定係夜場服侍客人，喺我角度，只要搵女人錢都係做鴨，不同行業嘅人，健身、剪髮，工作性質上都係𠱁女人開心，我一生遇過好多女人，𠱁到女人開心就𠱁到天下。」
灘叔透露自己長大的家庭中經常要與女人相處，所以自小便已好清楚女人。他又坦言監製吳君如是他遇過最難𠱁的女人，他說：「𠱁掂佢就得，佢係得一想二，所以我同佢講一時會袋咗個二先。至於磨擦就冇乜，大家上年都係投石問路，佢話唔得都會變成我動力，咪改到得囉。」
避講民生政治
「金雞系列」一向給香港人緬懷舊香港美好時光，灘叔坦言希望對香港抒發的感情於上一部中已經畫上句號，而今次更刻意不提民生政治，他解釋：「估唔到有咁大件事（佔領），每日facebook或者新聞都會見到好多消息，如果入戲院又係見呢啲，可能會有共鳴，但都可能會想逃避，所以今次幾刻意唔掂政治民生，因為對我最有感覺嘅係感情，唔只愛情，可以係對老人家嘅承諾，放唔低嘅人。人與人相處係最重要嘅事，大家都忽略咗，呢樣比起提返社會有幾差係更有意思。」
賀歲檔兩部片
二○○五年入電台前的鄒凱光有碗話碗，他帶點不好意思的說：「以前太直腸直肚，鬧人窒人寸人，我後悔到𠵱家，近年有好多我以前得失過嘅人都話我唔同咗好多，我都有同佢哋道歉得到原諒。我以前鬧過容祖兒，到𠵱家呢部戲先有機會道歉，個感覺係唔單止被原諒，而係大家都成熟咗，呢樣係緊要過我企出嚟話自己幾叻幾叻。」
為何心態突然大改變？灘叔表示上天於二○○五年給了他一個好機會：「嗰年舊公司執笠，窮途下入電台，學咗好多相處接觸，初期我都有唔開心㗎，會自己走上山話有冇搞錯呀要幫過十四歲學生解決愛情問題，但之後有人同我講我幫完個十四歲細路之後可能佢下半生唔同咗，我嗰吓就醒咗。」
鄒凱光賀歲檔期除了《12金鴨》外更有另一套合導作品《衝上雲霄》，他說：「我話你聽，今年四部賀歲片都係同一剪接！哈哈，我都唔知自己係咪行運，只可以話我係電台十年種下嘅種子終於開花。」
【明星客串大挑戰】
今次的《12金鴨》延續了「金雞系列」，找來一大班名氣十足的明星藝人客串，灘叔坦言：「次次都難諗㗎，唔可以畀對方感到串星呢個感覺，要畀個靚角色佢。卡士唔重複我哋更有挑戰性，好似今次謝霆鋒、梁洛施等我一向都想合作。梁洛施一落機就拍，成件事好amazing，佢一落機就有狀態，對比我以前見佢，佢成熟淡定咗，多咗份韻味，會諗嘢同消化，呢啲係要有經歷先會有。」
場地：EMax
