周四場非國盃四強，主辦國赤道幾內亞以0:3輸咗畀加納，主場球迷仲輸埋品，又掟嘢又衝入場搞事，最後要勞動防暴警察清場（上圖）。呢班球迷得個惡字，幫唔到球隊入決賽不特止，仲被非洲足協處罰十萬美元（約七十八萬港元）同支付加納球迷嘅醫藥費；至於加納下周日就會同科特迪瓦爭冠軍。
牌面較高嘅加納喺四十一分鐘，由前鋒基維斯艾比亞博到十二碼，佐敦阿休操刀開紀錄。五分鐘後，梅巴拉克幫加納贏到2:0。半場嘅時候，赤道幾內亞嘅球迷唔滿意球證判罰十二碼，已經有啲騷動。換邊後，赤道幾內亞冇咩起色，仲俾加納嘅阿休入到3:0。球員越踢越沉，球迷就越睇越火，去到八十三分鐘，主場球迷終於要爆！
加納決賽鬥象國
佢哋唔止向加納球員同後備席掟樽，仲衝埋入場令比賽暫停。球迷同防暴警察衝突，仲用膠樽掟向直升機（下圖）；警方都要用到催淚彈，花咗超過半個鐘先鎮壓到呢場騷亂。最後，比賽重開後互無紀錄，赤道幾內亞轉戰季軍賽，而加納就同科特迪瓦上演夢幻決賽。
識睇，一定係睇足英台【英波Live】：
http://soccer.appledaily.com
http://bit.ly/engballlive