隔牆有耳：
城市忍者中銀玩命 - 李八方

俄羅斯「城巿忍者」拉什卡羅夫（Vitaliy Raskalov）同馬克霍諾夫（Vadim Makhorov），上月原來偷偷「襲港」，成功闖入多個地點，包括中銀大廈高層外牆影相，仲喺英國《每日郵報》公開照片。兩人徒手爬遍世界各地摩天大廈，上月重臨香港玩Rooftopping，八方睇相已經標冷汗，佢哋真係搵命博。

中銀大廈樓高七十二層，高三百六十七米，佢哋話當日着西裝打呔，成功呃咗接待處職員，直闖五十六樓，拉什卡羅夫話：「他們見我們打扮光鮮，就准許我們進入。但因為天台有守衞，所以我們無法如願（登上天台）。」不過兩人仍喺大廈邊緣影相。其中一張相，見到相中人單手抓住大廈外牆圍欄，另一隻手豎起拇指，一隻腳凌空，一鬆手即刻粉身碎骨。拉什卡羅夫自言唔怕跌死，只怕跌到半死不活。