前保安局局長葉劉淑儀日前誤墮網絡騙局，畀黑客入侵電郵呃咗佢銀行戶口六萬五千元美金，事隔一日就成功追番筆錢，失而復得葉劉梗係開心啦，但葉劉冇諗過件事爆出嚟後，政圈八卦友更加關心，葉劉因乜解究幫襯瑞士嘅私人銀行，唔用番中資私人銀行呢？
有政界中人同八方講，幫襯瑞士嘅私人銀行，絕對係超級有銀之士，同時亦係希望高度保障自己財產嘅私隱，即係唔易俾政府check到佢有戶口喺間銀行度，唔係西方國家稅局、調查機構，點會成日追住呢啲銀行打！若然換着係泛民被揭喺瑞士嘅私人銀行有戶口，左報肯定大把嘢寫！
讚財富管理做得好
不過葉劉就同八方講，呢間瑞士嘅私人銀行，同佢已經合作好多年，仲話好多私人銀行都係外資，佢覺得呢間銀行財富管理方面做得好好，而且每間銀行一樣會有風險，加埋銀行都認有疏忽，並且向佢道歉，所以冇諗過用番中資私人銀行。葉劉又話其實今次事件入面，佢又確係「唔醒水」，唔少朋友都慰問同教路如何加強網絡保安，而佢第一時間已經改晒密碼啦。
好多議員都食住花生留意事態發展，工聯會黃國健笑住話，佢一定冇機會中招，因為本身冇咁多錢喺瑞士嘅銀行開戶口；做過資訊科技界議員嘅民主黨單仲偕話葉劉喺呢件事上至少有四大失誤：唔應該亂開不明來歷電郵、開咗都唔好入密碼、收到警告時應該馬上檢查電腦、最後，梗係嗱嗱臨改密碼啦。
李八方
mailto:[email protected]