高登女神魯芬，同韓國藝人李光洙的「能得利」廣告，近日在網上出擊，點擊率迅速過百萬，生動搞鬼的廣告，令魯芬再度人氣急升；同樣近日扮劉華扮到出晒位，俾一眾高登粉絲捧為男神的學舌鳥成員華Dee（何啟華），憑一首《日日去鳩嗚》，紅爆網絡。本報前日邀請了這對男神女神，大玩古今，先有模仿劉華重演《天若有情》三個經典場口，二人再以唐裝look寫大字，率先為大家提早拜年。
魯芬首度披婚紗
今次是魯芬第一次遇上華Dee，二人初次見面一拍即合，魯芬破天荒穿上婚紗，與華Dee重演電影《天若有情》中，劉德華和吳倩蓮攬腰騎電單車及求婚等經典一幕，搞笑啜核。魯芬要騎上電單車，當然有難度，但她一上車就恍如電影裏的JoJo（吳倩蓮戲中角色），小鳥依人，不過這位加大碼JoJo要戴上婚戒並不容易，由無名指變了戴尾指。華Dee當日亦全程以華仔腔、chok樣示人，事後他也大呻眉頭、嘴唇好攰。
首度穿婚紗的魯芬說：「睇過《天若有情》好多次，成日諗自己係後面攬住華仔個靚女，我呢一生人都冇乜機會，雖然𠵱家天寒地凍，但好過癮呀！我一生人都未着過婚紗，加上呢個華Dee又靚仔，大家合作得好愉快。」華Dee即扮劉華腔笑說：「魯芬前輩攬住我一瞬間，我feel到愛情呀，哈哈哈！」
魯芬BB近日拍「能得利」廣告人氣再急升，她說：「人生好得意嘅，起起跌跌，我入行差唔多二十七年，做演員乜都做。」華Dee因為一條網片，被網民要求拍一條完整版MV扮劉華，結果網上hit爆，他說：「我冇諗過有咁多fans，我𠵱家扮華仔聲講嘢，都覺得自己有啲黐線。」
採訪：溫敏芝、盧妹
協力：卓振輝、藍文浩
化妝髮型：Kathy Lam
婚紗：玲矓婚紗
【扮華三招】
現年二十五歲學舌鳥成員華Dee扮劉華扮到出晒位，究竟扮劉華有咩秘技？就由華Dee教大家三招，華Dee話要模仿其動靜，眉頭和嘴最緊要，不過大家有心理準備，學劉華「咪」起個嘴，矇起雙眼，keep住呢個樣講嘢係幾攰，邊講嘢邊舔嘴唇，舔得多個嘴唇真係會好乾，仲有，講完嘢後，大家最好加埋佢招牌式笑聲：「哈哈哈哈。」
