星期二走去睇操練，見到個馬騮仔同一隊球員一撞，膊頭甩臼，大象二話不說，十字車都唔叫，叫我車佢去太子師父仔間醫館，師父仔一見到，氣定神閒叫馬騮仔坐定，搵兩個助手扶住，跟住用陰力輕輕一托，馬騮仔唞一啖大氣，成身鬆晒，搞掂。我真係大開眼界，後面掌聲四起。
轉頭一望，原來係西班牙仔雅高，佢話之前喺老家遇到咁嘅意外一定入醫院，全身麻醉搞足半日，又紮又托又留醫，佢話中國醫術真係深不可測，話咁易就搞掂，好嘢好嘢咁話。我同佢嗲完兩句之後，又即刻轉話題同大家謀吓福利。
佢話：「今晚祖國有場大戰，馬德里打吡由馬德里體育會對皇家馬德里，我睇好皇馬客勝，因為馬體會近一個月打咗八場波，硬仗連連，打咗兩次皇馬兩次巴塞。雖然費托返到去表現好好，但不停硬砌，話冇大消耗就呃你嘅，鐵人都會搏到謝；而皇馬雖然有占士洛迪古斯重傷，但近排賓施馬當弗，啱啱滿三十歲嘅C朗（圖）又停賽復出，要喺馬德里打吡贏波，有機呀！」
佢仲醒多場星期日晚斯特蘭拉爾對登地聯嘅蘇格蘭足總盃半場入球「大」。斯特蘭拉爾要越兩級挑戰登地聯，論牌面，點計都冇得計。相反登地聯最近連續六場不敗，而且入波頻頻，麥基史提芬同史超活岩士唐都分別有五球同六球在手，對住咁嘅弱隊，半場實數幾粒。好！就信佢！
本地職業領隊
耳聽八方 專收好料