練馬師對待一啲名人愛駒，大多數傾向打快攻，因為對馬房有好大宣傳效應，當年郭富城隻「愛的呼喚」喺方廐正係一出即勝。所以另一名牌練馬師大摩，處理「菁英神采」肯定唔會手軟。呢匹馬嘅馬主團體成員，包括大劉紅顏知己呂麗君等名人，佢哋個個財力十足，如果「菁英神采」有好表現，將來隨時加碼，買更多惡馬支持大摩，大摩點會唔明呢一點，尤其呂麗君之前隻「替天行道」只跑過一次亞軍就退役，大摩更會肉緊對待「菁英神采」，以作補償。
「菁英神采」雖然只係四班馬，但潛力一啲都唔低，熱身兩場後，前仗84倍突如其來，直路由包尾狂追上嚟跑第三，顯盡質素，但由於三歲馬未到穩定階段，上次再配羅理雅，佢就搞唔掂，全程冇走勢落第。今次大摩變招咯，出到雷神執韁，騎功唔止高一皮，戰鬥力自然大增，雷神亦成擔心機教馬，親操多課，又試草地谷狀態，出埋王牌報爭今期(7日)賽事，有雷神此強援幫手，呂麗君隨時首次以馬主身份，殺入凱旋門。