超人李嘉誠嘅紅顏知己周凱旋（Solina）早排話會諗諗選特首，呢單新聞一出街，即惹嚟全城熱話，雖然超人已經代佢澄清話佢講笑，Solina亦都呻俾超人哦足兩個鐘，但係Solina「參選」就受到唔少網民歡迎嘞，Solina似乎有排解畫。
前日下午四點左右，一身中式唐裝打扮嘅Solina與兩名保鑣現身中環太子大廈，身邊一直陪住佢嘅係一位外籍男子，兩人睇嚟相當好傾，企喺大廈傾足十分鐘，之後佢哋就沿住行人天橋徒步行去ifc，兩個依然雞啄唔斷，一邊行一邊傾，但多數都係Solina講，外籍男就聚精會神咁聽，同時Solina就不停拎住部手機係咁㩒，騷畀對方睇之餘仲指手畫腳，去到ifc大堂，Solina依然講不停，呢個時候保鑣發現記者，就通知咗Solina一聲，Solina只係望一望，之後仲繼續一邊講，咁多嘢傾，應該同選特首冇關啩？