NBA啱啱公佈咗東西岸一月份最佳球員名單，團隊籃球再次得到肯定。上個月打十七場波全部贏晒嘅鷹隊，五個正選史無前例咁全部當選東岸最佳球員，真係威到盡，搞到火箭後衞「基石」夏登（James Harden）冧莊西岸每月最佳都冇乜人理。
K艾榮五十五分都冇份
全明星賽入選名單有限額，但常規賽每月最佳球員就冇上限嘅；喺一月錄得十七連勝破紀錄嘅一線鷹，控衞泰亞古（Jeff Teague）、三分王後衞高華（Kyle Korver）、小前鋒D卡萊爾（DeMarre Carroll）、大前鋒米爾沙（Paul Millsap）同中鋒賀福特（Al Horford），全部場均得分都有雙位數字，但就冇一個攞到二字頭嘅分數，真係平均到爆，結果就五個隊員齊齊並列東岸最佳。上個月尾對住拓荒者個人爆入五十五分兼趕上明星賽尾班車嘅騎士控衞K艾榮（Kyrie Irving），輸畀五隻精「鷹」攞唔到一月最佳，睇怕都無話可說。
鷹隊雖然周一俾塘鵝斷咗個十九連勝紀錄，但周三主場即刻贏巫師105:96。交出廿六分同八個助攻嘅泰亞古話：「我哋上場對塘鵝輸得好甘，今場贏波重回勝軌好重要。」開波前太專心備戰，到比賽完咗先知自己同四位隊友齊齊攞獎，泰亞古就話覺得好crazy：「不過咁就證明我哋係一個團隊，聯盟肯咁做真係好喇。」
識睇，一定係睇足英台【英波Live】：
http://soccer.appledaily.com
http://bit.ly/engballlive