Lulu身為女性，好多時都比較感性，就算睇波都會情感氾濫。近日有幾張相喺網上瘋傳，就係熱刺中場艾朗連儂轉會愛華頓後，影咗幾張拎住波衫嘅轉會相，相入面連儂黑晒口面，簡直係悲慘過世界末日咁嘅樣。
雖然咁多年嚟，佢都冇俾熱刺外借過，但要突然離開效力多年嘅球會，相信點都會有啲難受。其實踢波就好似感情一樣，一對情侶相愛多年，都會關係轉淡；有時分開吓，可能會有更好嘅未來喺度等你呢。球場同情場都一樣，如果冇機會，倒不如去搵第二春好過。
而最緊要嘅，係記得失戀並唔係世界末日，如果個個好似賓艾化咁，轉會不成就想退休，即係女仔冇人愛就去做尼姑，呢個世界仲得了嘅！
講咁多，其實都係想單身嘅朋友記得，情人節雖然就快到，但你哋絕對唔需要唔開心。因為我相信總有人尋找緊你，只係暫時未出現。所以，未有拖拍嘅話，可以先睇吓波。今個星期有倫敦打吡，熱刺對阿仙奴（紅衫），可以暫時將愛投放喺愛隊身上先， 好似我就投放咗喺阿仙奴身上嘞。近嚟阿仙奴個個球員都弗爆，而銀河唯一基奧特，表現更加係上晒身，加上大眼仔奧斯爾、禾仔等人都上力，我估可以贏熱刺2:1。
LULU
不懂踢波愛睇波