【ATV告急之北上秘撈】亞視向員工發糧如唧牙膏，被追緊了就出半份，對於要養家的員工苦不堪言，藝人慶幸仍可跑騷賺秘撈，未至於荷包乾塘。亞視一哥劉錫賢在這個環境下，繼續堅守崗位力撐亞視，他直言亞視份糧並不是收入主要來源，劉錫賢早已有後着，他已獲深圳大學邀請，為它們籌劃兩年制的演藝文憑課程，最快今年六月便開課。
叫王征跳船
劉錫賢一九八五年畢業於香港演藝學院戲劇系，曾在無綫做過編劇，三年後加入亞視，效力至今約廿七年，對於亞視大家庭仍是有感情，他說：「講真我出到街，發現真心支持亞視嘅人好多，我好希望啲股東真係良心發現，唔好閂水喉，幫吓亞視度過呢個難關。」劉錫賢去年跟亞視續約，合約到今年八月才滿：「我諗到嗰時，問題就應該解決咗，我喺呢度咁多年，最得着係亞視養大咗我，冇佢冇我今日，佢喺我衣食父母。」亞視舊將紛紛出言狂轟投資者王征，連劉錫賢都不幫拖：「我覺得佢真係應該要跳船。」
首次擔任大學演藝課程策劃人，對劉錫賢來說絕對是新挑戰，他表示北京有中央戲劇學院，他希望這次辦課程成功，打造一間南方的戲劇學院，劉錫賢說：「內地電影好有前景，所以深圳大學就開咗呢個課程，希望可以培訓台前幕後精英，我哋呢個課程好專業，有理論，也有實踐，將會全國招生，我會揀選好有教學經驗導師，在職藝人亦會做客席講師。」劉錫賢透露有意邀請武功了得的冼灝英師傅向學生教授真功夫。
採訪：比華利
