【本報訊】一支煙蒂釀奪命火警，二陂坊瞬間被恐懼籠罩，有居民經歷一段驚心動魄逃生記。同是居住起火閣樓劏房的男住客容先生憶述，火警時房燈突熄滅，漆黑得不見五指，繼而有刺鼻濃煙不斷襲來。
摸黑赤腳走火警
容先生形容「啲煙一千倍咁攻過嚟」，頓時手忙腳亂，「我拎起鎖匙開門逃生，差唔多成分鐘先開到門，跟住一仆一碌咁衝落樓。」本身無宗教信仰的容「臨急抱佛腳」，一邊摸黑赤腳逃命，一邊大叫：「耶穌救我……叫咗三十次都冇反應，就嚟死咁滯，啱啱走到落有氧氣地方，真係九死一生。」
另一住客表示，當時他在睡夢中聽到樓下大叫：「火燭，起身喇！」他定睛一看即見門罅閃出火光，開門即感熱力逼人，火舌濃煙狂舞，情急下豁出去，他打開窗口從三米高跳樓街，幸沒有受傷。「冇理由行落樓，都睇唔到，何況行落去要幾分鐘。」他自稱其跳樓逃生看似鹵莽，但其實是經過精心計算，自知跳下去都不會受傷，但最無奈的是單位遭焚毀，臨近新春倍感徬徨，惟有暫時入住梨木樹社區會堂。
■記者關震海