除咗講股，金利豐證券研究部執行董事黃德几（Dickie）原來對育兒都有唔少心得！有一仔一女嘅Dickie噚日就帶埋太太同四歲幾嘅囡囡（Aika）現身奶粉機發佈會，唔講股經，轉講湊女經。不過囡囡為此活動，請假半日冇返學喎。
Dickie認為，湊仔女同買股票一樣，基礎係最重要，所以點忙都會幫仔女沖涼，等仔女大個咗，關係就更親密，正如公司基礎做得好，股價先會升。
佢個寶貝女Aika眼仔碌碌，確係好可愛，兼且唔怕羞，笑晒俾人任影相，樂在其中，有「多倫多黎明」之稱嘅Dickie睇嚟應該好有機會做星爸，佢應該都唔會抗拒嘅。不過呢日Dickie兩歲半嘅細仔就冇請假，冇跟埋嚟同家姐一齊玩嘞。