有得揀先至係老闆，奈何香港冇普選，就要硬食呢個爛政府。費清唔係想激進，真係有感而發，只因運輸及房屋局最近一段宣傳片。
#冇樓就要瞓街
日前局長張炳良同學生見面，播放呢條《選擇困難篇》短片，片中首先話唔少人有選擇困難症，仲話呢啲人「麻X煩」（圖）。費清唔係斯文人，粗口都爆唔少，但都要睇場合，話晒係政府宣傳片，而且「寸」都係一種藝術，最高境界係自嘲，最低莊係嘲笑別人，就好似呢段片。
段片最恐怖係隱藏嘅意識，置業係部份港人嘅夢想，但並非「普世標準」，但片段講到好似有錢上車嘅係人中之龍，冇得置業就要瞓街，講到冇樓嘅人成個loser咁。Come on，運房局無非想迫大家支持佢哋搵地起樓，最好鏟平郊野公園起樓，好冇？
仲有，呢個唔係短片，而係小學雞級數嘅PowerPoint，只係將圖放埋一齊，fade in fade out，加個VO就當做短片。原來唔只特首唔識facebook，張局長都唔識YouTube。
條片上載政府新聞處YouTube頻道，好多人鬧爆新聞處，但費清聽講，段片係運房局請外判公司製作，運房局「獨具慧眼」選中呢條片。費清最後送番呢句畀運房局，嘥晒納稅人啲錢，「麻X煩」。
費清 ＃要生計，也要生活 ＃毋忘初衷