禮拜六沙田七草三泥賽事，草地用最狹窄之C加3跑道，睇番最近1月4日用同一移欄，當日六場轉彎路程賽事，放頭馬全部跑入前四名，其中「星夢」、「金珀龍華」及「火紅人」更加一放到底贏馬，可見前領馬佔盡優勢。
今戰列陣馬中，第三場「特務飛龍」係全場唯一贏過田C加3欄嘅參戰馬，難得同場快馬唔多，且戰且走有權再次一放到底。另外，尾場「魚躍鳥飛」三次角逐田C加3欄均不勝有位，回配莫雷拉隨時可放到。
至於三場泥地賽均跑1200米，此程一向利放唔利追，最近「三和福將」及「京城珍寶」都係擺前建功，頭場「永得米」、第四場「大把籌碼」及第六場「霸氣」等擅跑泥地之快馬可優先捧場。