周星馳《西遊記》裏邊有句名言，「估中咗開頭，但估唔到結局」，正好用來形容近日滬股通戰況。由上周三起，滬股通每日均準時在下午兩時四十五分、即A股收市前十五分鐘湧現買盤，綜合六日最後十五分鐘的買貨額高達一百一十億元人民幣，擺明係外資博內地放水而率先買貨。但禮拜三人行宣佈降準前夕，A股喺收市前最後一個鐘急插，一反慣例，再冇出現以往春江鴨偷步買貨情況。
不過，呢次外資過江龍大戰地頭蛇，到底誰是真正春江鴨，今日終於見真章。外資先估中阿爺會降準，真係好威，但A股倒跌收場，結果要坐艇；而內地大戶就借「滬股通撈底」消息乘機散貨走人。
講到底，A股係內地客主場，外來人想同佢哋鬥快炒消息，邊有可能會贏？今時今日，內地大戶主要喺期指搵食，T+0即日買賣，快上快落，隨時造好造淡，一日可以走幾轉。而外資無論通過滬股通或QFII，都只能喺現貨市場買賣，仲係行緊T+1，即當日買貨最快都要第二日先賣得，先天性輸蝕。
下禮拜一內地股票期權登場，又係T+0交易，兼且可以造淡，只有大戶先有資格買賣，到時A股恐怕更加難玩。
李可強