龍叔叔對懸疑驚慄片，不但有愛，而且寬容度極高，好似電影《心慌方》系列及美劇《迷》咁，睇完大結局都唔知佢講乜，冇所謂，最緊要劇情鋪排夠天馬行空夠過癮。
剛派碟嘅《移動迷宮》（The Maze Runner）都係呢一類片，改編自同名小說，好多人都期待導演點將小說嘅浩大場景拍出嚟。單係身處成個城市咁大嘅高牆迷宮，仲會定時變換排陣，基本上唔使旨意走得甩。影片一開始，已經營造出不寒而慄嘅絕望感。而且導演加入小說版都冇嘅元素，好似巨型「刀陣」，主角驚險地喺刀陣中穿梭逃命，都幾緊張刺激。而且節奏掌握得唔錯，成齣戲都冇乜冷場，論娛樂性已經要畀個like。
幾十個失憶後生仔，被困喺高牆入面，三年嚟生活自給自足，仲自稱呢個小家園為「極地」。只不過高牆外係一個超巨大迷宮，兼且有隻生物加機械嘅樣衰蜘蛛「夜煞」把守各區，好似「吖嗚」咁專喺夜晚出嚟嚇人。影片衝擊點係講男主角唔甘心一直困喺高牆內，努力跑出迷宮，點知俾住咗幾年嘅村民話佢破壞極地規矩，影響大家安寧嘅生活，小社區忽然分裂成黃絲同藍絲。有飯食咪得囉，你都改變唔到乜㗎啦，搞咁多嘢做乜？男主角熱血上腦，命都唔要想衝出鳥籠，唔單止諗計KO咗隻夜煞，最後真係俾佢搵到出路，帶大家逃出生天，絕對有資格登上《時代》雜誌封面。
電影版加強咗人物個性刻劃，令到好多村民唔再係茄哩啡一名。但龍叔叔覺得男女主角冇乜character，更稱不上係俊男美女，反而不得不提飾演保守派首領嘅Will Poulter，天生一堂高高戚起嘅「王小虎」眉，讓龍叔叔諗起李健仁嘅「如花」，由相貌到性格，都乞人憎到有啲可愛，係爭在未插隻手指入鼻度咋。原著都幾長，電影版只係先拍首部曲，主力堆砌懸疑同謎團，要解謎可能要等往後嘅三四五部曲。
CG解構最好睇
除咗鐵盒版外，港版BD冇乜花巧嘢，照舊唔見3D同Atmos音效，不過收錄嘅DTS-HD MA 7.1已相當不俗，尤其夜煞出場時，尖尖金屬腳篤落地下嘅清脆高音，以及迷宮變陣時嘅低頻音效，都大大增加咗聽覺上嘅刺激。Bonus算幾豐富，除咗製作特輯、圖集呢啲大路嘢，仲有導演以前拍過嘅一段動畫短片《Ruin》，勁有《Final Fantasy》opening嘅feel，仲居然收錄咗3D版本，要嗱嗱聲搵番副立體眼鏡出嚟欣賞。最好睇係特技解構，將畫面一分為二播番有CG同冇CG嘅分別，原來一班人嚟嚟去去只係喺草地上做戲，你會驚嘆現今CG叻得有啲恐怖，遲啲可能連龍虎武師同特技人都冇得撈。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
http://www.facebook.com/uncle.dragon.movie
