周三西甲補賽，皇家馬德里喺主場以2:1險勝西維爾，本來將領先巴塞隆拿嘅榜首優勢，拉開到四分係開心事，但呢場波，皇馬一次過傷咗近期大勇嘅占士洛迪古斯（J-Rod）同後防大將沙治奧拉莫斯，加埋馬些路儲夠黃牌要停賽，周六作客馬德里體育會，隨時會有五件主力缺陣，到時真係要靠停賽復出嘅基斯坦奴朗拿度（C朗）出嚟一個頂五個。
贏西軍折J-Rod、拉莫斯
開波九分鐘皇馬就先折一將，隊長沙治奧拉莫斯拉傷大腿肌肉要退下火線；三分鐘後皇馬先開紀錄，J-Rod接應馬些路傳中近門頂入；不過佢踢到二十六分鐘都頂唔順，除埋隻右腳波砵離場，由謝斯洛迪古斯入替。謝斯喺三十六分鐘建功為皇馬領先到2:0。去到完場前，西維爾由借將伊亞高艾斯巴斯破蛋，都係阻止唔到皇馬喺西甲連贏五場。
皇馬贏三分代價都算大，拉莫斯賽後經初步檢驗，預計要休養兩至三星期；J-Rod仲大件事，右腳蹠骨骨裂，手術後最起碼都要休戰兩個月。兩大主力都肯定因傷踢唔到周六作客馬體會嘅大戰，除此之外，守將馬些路亦因為儲夠黃牌要停賽，加上喺對西維爾場波已經因傷缺陣嘅比比同法比奧干查奧，趕及復出機會都唔大，加埋成五個球員唔踢得。對皇馬嚟講唯一好消息，係C朗停賽兩場之後可以候命囉。
神童踢B隊有料到
教練安察洛堤賽後話：「對馬體會我哋會有唔少重要球員缺陣，不過好多嘢都冇得後悔。拿祖費南迪斯（後備中堅）今場波後備入替踢得唔錯，畀到我哋信心；而我亦會就馬些路嘅黃牌提出上訴，另外干查奧亦已經開始復操，有機會趕得切候命。當然，C朗回歸就梗係好消息，就算近兩場波冇咗佢皇馬都照贏，但C朗對皇馬嚟講，始終係非常重要。」
占士有排唞，唔知安帥會唔會考慮畀機會神童馬田奧迪加特呢？呢位啱啱夠十六歲嘅挪威中場，喺周三首次登場。奧迪加特代表皇馬B隊出戰中超球隊北京國安，仲同J-Rod一樣着十號波衫上陣，表現仲相當唔錯，結果雙方賽和3:3。
識睇，一定係睇足英台【英波Live】：
http://soccer.appledaily.com
http://bit.ly/engballlive