下周五維園年宵開幕，公民黨除咗有書法了得嘅黨主席余若薇同市民寫揮春外，今年仲有好多雨傘運動主題精品。余若薇本來想將林夕填寫嘅《撐起雨傘》歌詞，選出其中兩句「一起的撐 不枯也不散」同「任暴雨下 志向未倒下」，由佢親題後印喺杯上，但冇大陸廠商敢承做，最終以咖啡杯代替，自行印刷墨寶插喺杯入面，余若薇話表達自由都受到打壓，覺得好傷心。
公民黨年宵攤擋仲會售賣上周日喺民陣遊行火速售罄嘅雨傘行李牌，再入貨二千個後，每個售價六十八蚊，相信會係鎮檔之寶。另外仲有每個只售二十八蚊嘅兩傘散紙包，同埋都係賣八十八蚊嘅鳩嗚環保袋同Umbanana黃色香蕉遮，創意十足。