中電總裁潘偉賢日前孖下屬同保良局社工義務去咗觀塘送被畀獨居長者，喺呢個流感肆虐嘅季節向長者噓寒問暖。
去到樂華南邨家訪時，潘偉賢唔單止𠱁得七十八歲嘅獨居李婆婆好高興，仲同婆婆嘅愛貓阿花玩得好開心，聽中電嘅公關講，原來潘偉賢係愛貓之人嚟㗎。
送被獲讚「好滑」
潘偉賢當日仲參加咗邨內長者中心嘅新年活動，大開金口獻唱《歡樂年年》、《迎春花》等賀年金曲，既然潘偉賢咁鍾意貓，下次應該唱番首兒歌《阿花的故事》啦。
聽聞潘偉賢去到探另一位楊婆婆時，婆婆向潘偉賢大讚「Good」，多謝中電送被畀佢，但原來婆婆唔係識講英文，而係講潮州話，意思即係被好「滑」嘅意思。