上周英超榜首大戰，戰況冇預期咁精采，車仔領隊摩連奴繼續今季對強隊策略：唔輸就收貨；「藍月」曼城想谷又谷唔起，可憐阿古路啱啱傷癒，七成狀態都唔知有冇，迪斯高後備入替又冇料到，領隊比歷連尼要怪就怪科特迪瓦點知唔喺非國盃分組賽出局，等韋菲特邦尼未能及時喺呢場大戰上陣。
曼城雖然季初受歐洲足協罰款，幾乎連歐聯資格都不保，不過一月收購邦尼（圖），輕輕鬆鬆再做埋今個轉會窗英超標王，對比車仔要賣走三個人先換一個古達度返嚟，真係夠晒豪氣。起初以為曼城要賣走迪斯高同祖維迪嚟填數，但兩人都繼續留低，我真係唔知曼城下季又點過到公平條款嘞。
曼城係英超少數球會採用總監制，即係同曼聯、阿仙奴同車路士等唔同，領隊唔會負責買賣球員，曼城嘅總監碧格利斯坦，相信巴塞對呢位仁兄都仲咬牙切齒，事關買賣伊巴謙莫域等勁蝕交易，都係出自佢老人家手筆。無錯佢喺西班牙人脈都唔錯，曼城領隊比歷連尼，據報同佢都好老友，比帥能夠接手藍月亮，碧格利斯坦背後應該發好多功，包括傳聞係佢逼走文仙尼。不過好坦白講，踢得曼城，唔多唔少都有過客搵快錢心態，以往羅賓奴、巴洛迪利如是，正如大陸水貨客日日落屯門掃貨，唔通真係貪屯門好風景咩。
文：牽牛