呢個禮拜上嚟《亂噏24》嘅嘉賓，可以話喺上一個月裡面席捲全港網絡！無論係大人細路坐巴士定搭港鐵，你總有機會睇過佢哋條復古MV。每當哼起呢首melody，你甚至會不期然跟住k返兩句！呢班友仔就係近期搞作多多嘅學舌鳥喇！
學舌鳥由三位骨幹成員組成。扮華仔嘅阿dee，真名真係叫阿華，花名又叫阿dee，難怪成個華dee上身咁款。揸fit人阿修讀編劇出身，仲有一副同黃之鋒撞樣嘅外表，再拍住正職從事副導演工作嘅阿天，三個麻甩仔，就咁搞興咗成個網絡！
問到華dee點解喺《日日去鳩嗚》MV裡面，扮劉華扮得咁似？華dee謙稱︰「我淨係識用嗰個好核突嘅表情去扮劉華，即係舔舌頭呢個！」太謙喇華dee，原來呢個《鳩嗚》MV之所以面世，正正係因為華dee一早就展露咗啲劉華嘅DNA︰「我拍上一條學舌鳥片，做茄厘啡嗰條片，觀眾就係畀呢個劉華表情吸引住！」導演阿修就話︰「人人好認真咁做緊戲，佢就又望鏡頭又指鏡頭，都唔知佢做乜！但係觀眾就覺得好搞笑，好想睇，所以就有呢個MV囉！」
原來上位靠手指指？柳爺忍唔住寸返句︰「正常真係拍電影嚟講，呢啲人應該一早畀導演趕走咗啦！你特登搶戲o架？」扮得咁似，搶都抵啦！
星期五六日《亂噏24》！搶戲搶到上埋位！