「消失的光陰散在風裏，彷彿想不起再面對……」當律政司司長遇上古惑仔陳浩南，都要走夾唔唞？袁國強噚日去美荷樓演講，細訴小強那些年嘅遭遇。原來佢喺黃大仙上邨長大，有次同家姐喺屋邨空地打羽毛球，家姐忽然拉走佢，當時佢仲懵盛盛唔知發生乜事，「原來黑社會斬人，喺後面劈緊友」！
雖然當年環境比較雜，袁國強好懷念以前射波子、踢波嘅日子。喺黃大仙官立小學畢業後，小強升讀旺角伊利沙伯中學，初中成績水皮，會考成績都係僅夠升中六。當年佢諗過讀建築，但有師兄提醒要畫功好，「我畫得好肉酸」；加上當時爸爸退咗休，做律師較有錢途，所以讀法律。佢話考入港大時好囂張，覺得自己係叻叻豬喎！袁國強仲教在場學生，唔好只係上網搵資料，要多睇書，就算睇八卦雜誌都冇壞，「令你嘅思想可以活一啲」。佢話曾為一單官司寫結案陳詞，但苦無論據落筆，忽然諗起喺英國買過一本書，結果從中搵到料。
拒申學貸體現香港精神
袁國強自言中三起做兼職，大學時又教夜校，被問到點先係香港精神，佢話當年升大學想申請貸款，但強爸話應付到，資源應留畀有需要嘅人，「喺我哋嗰輩，有問題我哋自己解決。起碼我哋嗰代嘅香港精神，真係好少話有呢個問題，點解我爹哋媽咪唔係百萬富翁、我可以住好啲嘅地方？點解我返學係搭三號巴士，隔籬嗰個有車接送？」
尚未娶妻但唔知有冇女友嘅佢，噚日被問到當年讀書突然變好，會唔會好似資深大律師陳志海咁，因為識到個靚老婆而發憤呢？佢唔講有冇為博紅顏歡心，但踢爆陳志海當年因為未來外父講過，如果唔娶佢個女，就會帶阿女移民，終令佢發憤圖強喎。
李八方
mailto:[email protected]