【專訪】
澳門博彩收入連跌八個月，昔日財源滾滾來的貴賓廳生意在內地打貪下，顯得特別冷清。不過，四十年前已跟隨「賭聖」葉漢殺入叠碼仔行列、專門負責招攬豪客賭錢的澳門勵駿（1680）聯席主席兼行政總裁周錦輝仍對濠賭前景信心滿滿。
記者：吳永強
對於近期賭廳執完一間又一間，他亦見怪不怪地指，「賭廳開同閂只係一雞死一雞鳴，幾十年都係咁，我一啲都唔覺得奇怪喎」！
廿多歲已加入叠碼仔行列的周錦輝，當年由澳門打入拉斯維加斯，到八十年代又回歸澳門搏殺，見盡中西兩大賭城的光輝時刻。眼前澳門的濠賭業，特別是佔博彩收入達六成的貴賓廳，遇上近年罕見的冷鋒。周錦輝似乎亦不以為然，「只係前一兩年特別好，𠵱家都唔係唔好」。
叠碼仔應諗計變陣
踏入新一年，先有大衛集團於上月宣佈關閉旗下三間賭廳，其後另一叠碼仔金滿集團亦有類似行動。周錦輝認為，「汰弱留強箒，我喺度咁多年，我自己睇唔係話𠵱家多啲（賭廳執笠），其實以前都好多。」他指出，或者過去賭廳在市場較為低調，故未有太多人留意賭廳的經營情況。
濠賭生意回落，周錦輝認為叠碼仔現時應趁市況較淡靜，另闢更多新的財源，「應該用𠵱個機遇，去思想一下，唔好依賴晒𠵱家原本喺度嘅嘢。」過去曾將東南亞賭團引入美國及澳門賭場的周錦輝指出，現時澳門叠碼仔主力依靠中國市場，亦應開始重新探索東南亞，包括越南、老撾及柬埔寨等市場。他表示，「𠵱啲都係發展中國家，以前可能連咖啡都飲唔起，但有啲𠵱家識飲『貓屎咖啡』㖭！」
除了叠碼仔要自己懂得諗計變陣外，周錦輝亦認為賭場營運商亦有責任繼續多元化旗下的賭場度假村，做到百貨應百客。他指賭場要成功吸客，最重要是能滿足客人，「要配合客人嘅需要，比如以前佢鍾意行路嘅，咪整靚啲條路。𠵱家啲客人鍾意坐車嘅，你咪買架車囉！」但他認為，現時有部份賭場營運商未掌握到吸客的竅門，「比較懶啲，起間酒店，擺幾張賭枱落去就算……好似有個回教客嘅，你個酒店有冇地毯畀人祈禱呀？你要開新市場，係要迎合吓人哋嘅生活方式同文化」。