馮仁昭記得，曾志偉係今個月一號，先出席政協十二屆廣州委員會第四次會議開幕，猶記得佢仲話會喺會議上面交有關教育品德提案，但係近日內地《中國青年報》嘅報道痛斥志偉冇盡做政協嘅責任。細閱文章發現，原來係話志偉冇出席另一個地方政協委員會嘅會議，話佢自從二○一一年當選為江門政協常委後，一直缺席江門會議。
話說大前日（三號）係江門市政協委員報到日子，志偉都冇現身。文章批評志偉：「當選後等於從來沒有履行政協委員應有的基本職責，既不符合相關規定，也有違公序良俗。而且，此舉會形成惡劣的示範效應。特殊對待明星委員，會破壞規則的公平。」文章仲講到政協委員職責係參政議政，一個缺席，就代表六十四萬人失去權利，當選委員要有自知之明，唔能佔着位置唔發揮作用，辜負公眾嘅信任。按照規定，若果當選政協後，確實自己唔能夠履行職責，就應該主動或者被動接受辭職。
講開藝人做政協委員，馮仁昭記得陳小春同何家勁就係廣東惠州政協，佢兩個日前就好乖咁出席咗當地會議，雖然冇發言，但都叫做盡咗責任。
已向江門辭職
志偉噚晚到灣仔出席電影首映，被問到請假四年冇開會，佢話：「係呀，四年咁啱撞咗，除咗江門之外，自己都係廣州政協，成日兩地開會時間撞咗，我以廣州為主，向江門請假，噚日睇到報道都唔好意思，打咗電話去江門辭職，藝人做政協特別辛苦，功課要更加做到足，有時會都未開，傳媒就問會講啲乜。」對於被官方傳媒點名指係壞榜樣？志偉笑笑口話：「係啦，我都唔好意思。」
撰文：馮仁昭