第二輪政改諮詢都開始咗成一個月啦，但觀乎政改三人組今次嘅諮詢，真係冇首輪咁有聲勢。梗係啦，泛民話明唔接受八三一框架下嘅政改方案嘛，仲做咁多大龍鳳把鬼咩。但唔少政界花生友唔係咁睇，佢哋話如果政府覺得政改通過機會等同零，林鄭月娥又為乜頻頻要去到愛國愛港地頭，同一面倒嘅聲音搖旗納喊？
有政界中人話，八三一人大決定下，次輪政改諮詢可以傾嘅嘢確實唔多，因此泛民建制兩邊都企得好硬，但實情最關鍵嘅，其實係企喺中間嗰大部份市民，因為結果會點，都係得呢班市民可以左右大局。
民意牌打向中間市民
問題就係：點樣先可以令中間嗰班市民撐政改呢？呢位政界中人話，林鄭明顯打緊民意牌，雖則佢去嗰啲場合，都係建制陣營主辦，但傳媒報道出嚟時，啲市民查實係唔多理林鄭去咗乜場合，只記得佢講咗啲乜嘢。「好似最近佢講嗰句距離普選『一步之遙』，好多市民都好記得，仲可以講得番出嚟，呢啲潛移默化工夫，林鄭喺呢啲騷真係表現唔錯。咁鬼積極爭民意，所以唔係好信佢哋話政改通過機會等於零囉」！
呢位政界中人仲話，不妨留意律政司司長袁國強同政制及內地事務局局長譚志源呢次訪京有冇乜訊息帶返落嚟，尤其係公民黨湯家驊提出嘅換票條件，到底中央騷唔騷？基本法委員會委員陳弘毅嘅白票守尾門建議，唔排除會觸及喎。
花生友