立法會財委會上屆主席吳亮星舊年審議新界東北撥款時，為配合政府粗暴剪布一幕引起公眾強烈反彈，所以今個會期先搵番自由黨張宇人做主席。不過，張宇人雖然比起吳圓滑，但安排議程都被指偏幫政府，噚日會上公民黨毛孟靜一時感慨，竟然懷緬吳亮星做主席嘅日子﹖佢鬧張宇人一味配合政府：「反而覺得吳亮星做主席仲有啲基本公道精神，起碼一路忍咗好幾個星期……」此言一出，建制議員嘩嘩聲，民建聯陳鑑林發言加把口，話Miss Mo「㩒住良心讚吳亮星」，言下之意即係唔認同吳主持會議公道啦，點知張宇人都不甘後人摻一腳，話過去兩年都未見過吳亮星笑得咁燦爛喎。