【本報訊】以苦澀聞名的黃連竟然是減肥聖藥？港大化學系研究助理教授王凱峰引述早前的研究指，黃連、黃柏和三顆針三種中藥的活性成份黃連素，能有效將「壞脂肪」變為「好脂肪」，擬據此發展草本產品。中醫藥界指黃連和黃柏一般用作清熱瀉火、消炎清熱，不能單一用作減肥，實際處方以病人體質為依歸。
好少劑量已經好苦
港九中醫師公會名譽會長何國樑對使用上述三藥材減肥感訝異，「啲藥用於消炎，三顆針未聽過，蠶豆症唔食得黃連，用嚟清熱瀉火、消炎清熱，裏面有乜成份就唔知，但都冇乜可能會做到減肥效果」。
他直言鮮會接收減肥個案，「我通常都唔做，過後咪一樣肥番，無謂呃人，最多幫佢去水、消脂，你肯食（藥）咪得囉，隔日隔日，個零月咁食，一停又嚟過」。他指即使是針灸，也沒可能令肥胖斷尾，「唔運動，照樣飲食習慣，永遠都做唔到，你肯運動，根本就唔需要食藥」。
註冊中醫師嚴耀堅指要視乎病人體質用藥，「基本上我哋唔會用呢啲藥嚟減肥，黃連係濕熱、生暗瘡、胃熱、胃痛、胃脹、大便爛，都會用，清理中焦胃部熱症；黃柏重點下焦熱症，主理腸部，有強嘅涼血功能」。
他指兩種中藥均比較苦寒，「要啲想減肥嘅人經常食啲苦藥，唔係咁容易接受，黃連劑量好少已經好苦，如果做成丸劑，會容易啲食用」。
■記者張嘉雯
