喺今個冬季轉會窗後，小弟諗起高登嘅阿仙奴改歌《兵工廠下》，入面有句：「球隊的標誌沽清，每一季被人肆意兼併，那一個轉會窗可似水恬靜？」重點係最尾嘅一句，睇番成個歐洲球壇，呢次轉會窗唔單止恬靜，真係唔覺佢開始，又唔覺佢終結。
曼聯向來係轉會傳聞嘅大戶，但傳媒一年三百六十五日密集式，係咁報曼聯嘅轉會傳聞，傳咗大半年，一係史杜特文，一係曉姆斯。嚟到冬季轉會窗開啟，都仍然係史杜特文同曉姆斯，人有審美疲勞，曼聯球迷都有轉會疲勞，覺得轉會期同普通日子都冇分別。阿仙奴向來唔鍾意冬窗買人，今年買咗個中堅都算畀面。叫做活躍少少嘅係，爭緊英超冠軍嘅曼城同車路士，但喺財政公平政策之下，兩隊都唔夠膽狂買人。
反而，小弟覺得中國嘅轉會市場幾多姿多采，例如廣州恒大大換血，送走基拿甸奴同迪亞文迪兩個名大於實嘅意大利球員。佢兩個畀小弟嘅感覺，就好似當年嚟南華嘅畢特同基士文，都係一支球隊攞到一定成績時，開始大想頭，要買星，點知啲星好睇唔好用。恒大今季買人實際番啲，喺巴甲簽咗列卡度高拉特（右），身價一千五百萬歐元，係今個轉會窗第六高嘅身價；恒大仲以一千一百萬歐元買入阿倫，係呢次轉會窗嘅第十三高身價。山東魯能亦唔執輸，喺明尼路簽迪亞高泰達利，巴西國腳嚟㗎！當然，仲有孔卡去上海上港，卡希爾去申花，同樣震撼亞洲球壇。
文：咖喱