日本組合AKB48紅足幾年，雖然𠵱家日本已經有好多人覺得有啲厭，想佢哋消失，不過，AKB始終識得製造話題，而且佢哋最厲害嘅係冇底線。AKB成日喺節目入面玩到癲，成員互相摸身摸勢，甚至胸襲。近來佢哋嘅節目《AKB調查》亦好大膽，之前有最美胸部、最美肚臍選舉，已經俾人話鹹味十足，但今個星期嗰集選美唇，更被指鏡頭似足AV。
《AKB調查》係成員之間喺AKB集團多個組合入面選出乜乜之最，今個星期選美唇之最，就不停近鏡拍成員嘴唇，有啲飲緊水、有啲食緊嘢、有啲將紅唇微微張開，好似好誘惑咁。於是有鹹濕粉絲就話，成個節目啲鏡頭似足AV片，抵死在仲有網民將一個全部口部特寫鏡頭嘅AV封面上載，證明個節目幾咁似AV！而美唇冠軍由小嶋陽菜奪得，佢仲喺Instagram度話好開心，又上載咗張輕按嘴唇嘅照片，電死宅男。