香港圖博民族自決會創辦人招顯聰噚日喺觀塘法院，否認舊年十月佔旺其間阻撓、抗拒兼襲擊警員，其間俾主任裁判官練錦鴻問起佢嘅經濟狀況。招顯聰話靠社運朋友接濟囉，練官聽完即刻問：「邊個朋友？咁好，介紹我識。」但佢唔肯開名，練官決定將保釋金由原本五百蚊加到五千蚊，佢霎時間冇咁多現金要收柙，等到馮智活牧師幫佢畀尾數先放番出嚟。 點知招顯聰同練官講自己唔再住喺報住嘅工廈，守唔到宵禁令，新住址係油尖旺食物銀行行長龍緯汶嘅辦公室。練官話非住宅地址唔得要再還柙佢，搞到龍即時飛的到法院畀一千蚊做擔保人先贖到人。招顯聰喺庭外呻俾練官留難，話會考慮投訴喎。