香港航空成日想搶國泰航空（293）與旗下港龍航空嘅客仔，𠵱家就擺明車馬搶走港龍嘅飛機餐供應商先嘞。太興舊年三月先至同港龍合作，喺港龍飛機上供應罐裝港式凍奶茶，點知一年唔夠，太興呢個月轉咗去同香港航空合作推出「太興飛機餐」，菜式包括蜜汁叉燒、燻蹄、椰皇蝦球等。
太興主席陳永安透露，今次合作足足傾咗八個月（咁即係一邊同港龍合作，一邊諗緊轉會？）原本喺港龍飛機上面派嘅罐裝奶茶，三月開始亦「轉會」去港航。
搞緊上市嘅港航一直動作多多，除咗有新嘅飛機餐供應商，公司商務總監李殿春又不停硬銷即將上映嘅電影《衝上雲霄》，事關港航有份贊助。
查實贊助《衝上雲霄》同機上派奶茶都係國泰做先，港航之後搶過嚟做，睇嚟港航真係好想追住國泰嚟打。