呢論都有唔少人討論「波霸餐廳」Hooters，聽講仲話要喺香港開五間。不過菲菲都唔睇好，香港女仔一般比較保守，又靚又有身材嘅，真係唔需要去做呢類着得咁少布嘅侍應。請唔到合適港女的話，恐怕間餐廳出來嘅形象，會似駱克道啲酒吧。油價呢兩日極速反彈，布蘭特期油仲由一月低位反彈兩成之多，技術上步入牛市周期。呢個時候有唔少聰明仔話，油價貴番，咁替代品太陽能股自然受惠。所以前晚美國中資太陽能股勁升，連帶港股噚日都有唔錯表現。
不過事實往往係殘酷，因油價升好跌好都同太陽能冇關係。事關油主要用途係汽油，而再生能源係用來發電，如果拎汽油去為電網供電，成本會高得過份。與此同時，油價一年前都升到澎澎聲，如果兩者真係有關係，多晶硅價就唔會跌咗成四年咁耐。反而，太陽能真正替代品係煤、天然氣、核電先啱。
兩樣資源，雖然基本上係兩個市場，河水不犯井水，問題係社會同股市都係反智的，當全世界口徑一致話佢哋關事，所有人都唔理後果衝入去先算，博佢短炒個水位。咁的而且確，漢能（566）主席李河君超越馬雲做首富，股價越升越有，噚日創埋新高，帶動板塊向上。太陽能股近期表現唔錯，都可以買啲龍頭，好似保利協鑫（3800），又或卡姆丹克（712）博一個小反彈。
Fifi
本欄逢周二、四刊出
http://www.facebook.com/lovefrystock