輸咗一場特首選舉，對前政務司司長唐英年嚟講，算得係乜吖？事關佢未出娘胎已歷「風波」，相對被揭黑材料下嘅選舉挫敗，認真濕濕碎。
最近出版嘅《唐翔千傳》，大爆唐唐出世當晚，天文台掛九號風球，唐唐爸爸唐翔千喺狂風大雨下，急call的士送太太去養和醫院，終於喺凌晨誕下唐唐。未出世已經喺媽媽肚裏見識過九號波，試問點會仲驚其他風浪？原來喺唐媽媽懷孕嘅時候，唐唐阿爺唐君遠已經幫孫仔改咗名，「千」字輩後係「年」字輩，最後取名英年，希望長孫係智慧過人嘅英才。
唐唐近日向傳媒贈送爸爸自傳，等大家了解吓老父奮鬥史，佢今個新年留港過年，順道為稍後推出嘅政改建議做好準備。