八方早前寫過，身為馬主嘅立法會工業界議員林大輝，去年底有隻新馬「爆奇妙」抵港後，通過檢疫卻不斷腹痛肚屙，屢醫無效後要人道毀滅，搞到大輝好傷心。當時大輝已預告，下隻新馬可能叫「小奇妙」，以免個名太「爆」，馬兒無福消受。
踏入羊年前，大輝噚日向八方報喜，「小奇妙」（圖） 來港有望嘞！佢透露透過馬販買咗隻澳洲馬，重一千一百磅，而「小奇妙」已經抵達檢疫營，正在等候來港，佢預料匹馬二月底就可以抵港，過年後可以同新愛駒見面嘞。八方祝大輝新一年馬運亨通，唔知仲未決定係咪加入自由黨嘅佢，係咪更想政途暢通，強勢殺入新界東？