今期谷戰話就話用全闊A欄，不過一檔馬跑落冇乜優勢，跑到第五場一檔馬只得「情投意合」上名得第二，反為外檔馬入圍次數仲多，就算內檔取勝之「光輝之星」同「自成一格」都係從外叠後上建功。
去到第六場四班一哩，抽最外檔之蔡神仙蔡約翰之「神州魅力」同樣後上取勝，此駒賽前一日做過大熱門，之後賠率回升，臨場重新起飛，畀落飛黨打到5.2倍綠燈次熱開跑，結果在雷神胯下轉彎走最外叠蝕盡位，都能夠發揮凌厲後勁取得服役首捷。雷神頭五場輸晒，第六場終於識贏，個人累積連勝八期未斷纜，賽後「神州魅力」馬主鍾少甫醫生一位身穿白衣的靚女親友現身凱旋門，搶盡鏡頭。
今場二至四名都係中內檔馬，分別係大熱門「君悅灣」、新勝馬「盈豐駿駒」同半冷門「馬利多」，四重彩派一萬四千幾，三Ｔ大彩池結果正獎有人中，每注派162萬。