澳門各大賭場近年都好響應阿爺嘅號召，搞多啲非博彩活動。當中「賭后」何超瓊就特別鍾意藝術嘢，繼過去兩年舉行過文藝復興畫展同埋獅子雙年展，下月中就搵咗葡萄牙當代藝術家Joana Vasconcelos，喺澳門美高梅舉行一場為期七個月、叫做「Joana Vasconcelos at MGM MACAU」嘅裝置藝術展覽。
Vasconcelos今年44歲，早喺十年前就已經成名。當年佢喺全世界歷史最悠久嘅當代藝術大展「威尼斯雙年展」，用咗二萬五千條衞生棉條設計咗個叫做《新娘》嘅雕像後，就開始受到國際注目。佢之後喺法國凡爾賽宮同以色列特拉維夫藝術博物館等地舉辦過個人作品展，著名品牌Dior亦都有邀請佢展出作品。
今次Vasconcelos幫美高梅設計嘅裝置藝術會掛喺美高梅天幕廣場嘅半空，係佢自己創作嘅藝術裝置規模最大嘅一個。