立春一到，港股回暖。恒指昨漲124點，收報24679，收復十日線，蓄勢再試25000。現時各國貨幣政策鬥寬鬆，人行昨日傍晚亦宣佈降準，全球資金流動性充裕，利好股市，恒指料於24500有一定支持。距離農曆新年只剩十個交易日（包括今日），睇返過去十九年，春節前十個交易日，滬指有十六年上升，機會率84%；春節後十個交易日有十五年上升，機會率79%。今年又點？希望春節效應二十年都靈啦！
現時市場對環球經濟有疑慮，投資者心儀業務及派息穩健的高息股。我向來係好息之徒，近日睇中一隻股息率十八厘細價股－－遠大中國（2789）。遠大雖細價但就幾駕勢。該公司係中國幕牆建設龍頭，有份參建北京奧運場館鳥巢和水立方，二○一一年五月在港上市。二○一三年八月國家主席習近平到東北調研時曾參觀遠大，讚揚董事長康寶華將中國高級建築技術打入世界各地；二○一四年三月總理李克強亦到遼寧考察遠大。
遠大業績唔爭氣。受累內地房地產業不景氣，部份海外工程又交學費，遠大近兩年業績走晒樣；二○一三年下半年扭虧為盈後，二○一四年上半年又見紅，蝕過億元。其實二○一四年上半年遠大國內外生意都有錢賺，但內房市道差，有中小型發展商拖數，出現壞賬才見紅；管理層拍心口下半年可收復失地。展望二○一五年滬深兩幢興建中的中國最高建築物－－上海中心和深圳平安金融大廈，都係遠大客戶，今年落成入賬，有望省靚業績。
業績見底趁低吸
我認為遠大盈利有見底迹象，二○一四年全年純利有望接近二○一一年高峯期的8.5億元人民幣。遠大十二月底年結，三月公佈全年業績。上市後三個年度的全年派息，分別係四仙、四仙及八仙，我估計下月公佈業績時仍會派息。遠大上市以來，康老闆曾多番在市場增持，單計上季，十月中至十二月中就二十一度出手，平均價0.48元；其中十二月最頻密，十二度擸貨，用真金白銀投下信心一票。不過，市場有好多投降盤，以致股價冇起色。
遠大股價雖然低殘，但市值仍近三十億元，街貨約十億元。此股現價0.445元，比每股資產淨值0.693元人民幣（折合0.86港元）低近五成，亦比上市價1.5元低七成；加上過去每年，以全年計仍有錢賺，亦肯派息，業績又有見底迹象，具一定值博率。策略上，現時可趁低吸納；不過，始終中期一再見紅，落注時宜保持戒心。
割柑人
本欄逢周四刊登