過去兩年，時不時有專家財演走出來推薦城鎮化概念股，建材、內需、嬰兒、汽車幾個板塊炒完再炒。但喺過去幾個月，已經幾乎冇人再提，大家都知道政策冇料到。噚日發改委終於公佈城鎮化綜合試點方案，市場竟然冇反應，可見股民已經心死。方案拖咗成年，但之前一日未公佈，都仲可以有幻想，而家終於有咗出世紙，反而變咗死亡證，正式宣告城鎮化概念死得，冇得再炒。
按照呢個方案，城鎮化現時只會有江蘇同安徽呢兩個省，再加其他六十二個中小城市，作為試點。中國有二十四個省份同超過二千個城市，呢個試點範圍，只佔全國極少部分。二○一三年城鎮化最熱炒時候，當時話城鎮化可以帶動二十萬億元投資，而家諗番，恐怕得啖笑。方案話明要到二○一八年後才考慮向全國推廣城鎮化試點地區的經驗。即係話喺未來三年，唔使旨意會有城鎮化大動作。
方案長達二百七十八頁，除咗頭五頁有政策內容外，其他只是將呢五頁內容，喺江蘇同安徽兩個省，以及其他六十二個試點城市，照copy六十幾次。求其成咁，擺到明只係用來交差。至於政策內容全部虛無縹緲，主要涉及戶口同城鎮管理，可以話同投資無關。
李可強